Gester Obig hend mir üs nach churzer Theater-Pause wieder troffe ide Bäsebeiz am Hüttnerseeli.
Mit Apero-Drinks und sehr feinem Ässe, händ mir dörfe zrugg blicke uf e wunderbari und erfolgrichi Theatersaison 2023; und das nach 3 Jahr Summerferie :-)
Es isch wiederum en sehr amüsante und eifach total luschtige Obig gsi mit de ganze Theatergruppe! Das einte oder andere Episödeli vo de Saison und Blick id Zuekunft hät natürli au nöd dörfe fähle :-)
Danke säge möchtet mir a dere Stell all üsne Fans, wo üs au nach längerer Zwangspause unterstützt händ mit em Bsuech im Tal und üs so ihri Treui zeigt händ!
E wunderbar luschtigi und sehr familiäri Ziit uf und hinter de Bühni gaht für de Moment z'Änd; doch freued sich alli bereits jetzt scho wieder uf die
nöchschti Saison uf de Bühni im Wägital! Mir hoffed sehr, dass au im 2024 alli Fans wieder mit debi sind!!!
De Präsident hät zudem zum 30 Jahr Jubiläum vo de Wägitaler Theatergruppe a dem Abschluss-Obig no dörfe es paar vo üsne Mitglieder zu Theater-Veterane vom ZSV, Zentralverband Schweizer Volkstheater, ernänne. Wer mindestens 30 Jahr aktiv und sich damit bsunders fürs Amateurtheater und fürs Volkskulturgut igsetzt hät, hät Anerkennig verdient! Mir gratuliered üsne Mitglieder zu dere Ehrig und sind sehr stolz uf sie (sie alli chömed de ZSV Ehre-Pin und en Uswiis über, wo zum kostelose oder vergünstigte Itritt bi sämtliche agschlossne Gruppe berächtigt):
- Silvia Züger - üsi Regisseurin - BRAVO BRAVO BRAVO und danke für dini ville Stunde und dis Engagement für de Verein i all dene Jahr als Spielerin und Regisseurin und eifach gueti Seel vom Verein; mit dinere positive Art begeischterisch du nöd nur üs uf und hinter de Bühni sondern empfangsch au immer all üsi Bsuecher mit ganz vill HERZ!!!
- Edith Züger - üses ältischti; mit ihrne bald 86-gi aber wohl modernschti, up to date Mitglied; sie hät üs jahrelang immer a de Kasse und am Empfang unterstützt und isch au hüt immer no bi gselliger Rundi sehr gern debi (mir hoffed no ganz ganz lang). Du bisch eifach e cooli Socke Edith!
- Roman Ziltener - als ehemalige Spieler (villicht au denn wieder emal uf de Bühni) und im Parkdienst all Jahr engagiert; Danke für din Isatz
- Martin Schnyder - als ehemalige Spieler (au du villicht wieder emal uf de Bühni) und au im Parkdienst all Jahr engagiert; Danke au dir für din Isatz
Punkt 12i hämer denn üsere Elisabeth no dörfe zum Geburtstag gratuliere und es Ständli bringe. Happy Birthday Elisabeth und danke villmal für d'Rundi!!!
So isch üse Obig denn zur später Stunde leider langsam z'Änd gange und es händ sich alli wieder uf de Heiwäg gmacht (natürlich isch immer no wiiter glachet worde und de eint oder ander hät sicher au dihei im Bett no glachet :-))
Jetzt freued mir üs uf die nöchsti Saison und grüessed alli rächt herzlich
WÄGITALER THEATER
Es paar Bilder zu üsem Abschlussässe